Ўзбекистон Электрон оммавий ахборот воситалари миллий асcоциацияси ва Корея Республикасининг “KBS” телекомпанияси ҳамкорлигидаги биринчи ижодий иш – ҳужжатли фильмнинг тақдимоти бўлиб ўтди...
Ўзбекистонлик ва кореялик ижодкорлар томонидан суратга олинган ҳужжатли фильмларида икки халқнинг бой маданий мерослари, миллий урф-одатлари, қадрият ва ижтимоий иқтисодий ривожланиш даражаси кенг очиб берилган.
KBS телекомпаниясининг юртимиздаги тасвирга олиш ишлари 2017 йилнинг 4-23 октябрь кунларида бўлиб ўтган эди. Яна шуни таъкидлаб ўтиш лозимки, Корея киноижодкорлари томонидан суратга олинган “Ариранг Саша” фильми Ўзбекистондаги корейс диаспорасининг 80 йиллигига бағишланган. “Ариранг Саша” фильми айни кунларда рус ва ўзбек тилларига овозлаштириш жараёнида бўлиб, тез кунларда ўзбек телеканалларида ҳам намойиш этилади.
Ўзбекистон Электрон оммавий ахборот воситалари миллий ассоциацияси қошидаги телеканал ижодкорлари — журналист Феруза Элмуродова бошчилигидаги ижодий гуруҳ ҳам Корея Республикасида бўлиб, икки мамлакатнинг дипломатик муносабатларига 25 йиллигига бағишланган ҳужжатли фильм сурат олиб қайтишган. Кореядаги ўзбек тадбиркорлари, у ерда таълим олаётган ўзбекистонлик ёшлар ҳақидаги мазкур фильмнинг монтаж ишлари тугатиляпти, у ҳам тез кунларда томошабинлар эътиборига ҳавола этилади.
“ЎЗБЕКИСТОН ВА КОРЕЯНИНГ БУГУНГИ МУНОСАБАТЛАРИ КЕЛАЖАКДА ЎЗ ИЗИНИ ҚОЛДИРАДИ...”
Ўзбекистон ва Корея Республикалари вакиллари иштирок этган тадбирда Корея Республикасининг Ўзбекистондаги элчиси Квонг Ёнг У ҳам иштирок этди...
Квон Ёнг У: — Икки Республика ўртасида ўрнатилган 25 йиллик дипломатик муносабатлар давомида икки томонлама жуда кўп ижодий ишлар, ҳамкорликлар қилинганини кўриш мумкин. Айниқса, Ўзбекистон Республикасининг Президенти Шавкат Мирзиёевнинг ўтган йилнинг ноябрь ойида Корея Республикасига бўлган расмий ташрифини ҳам алоҳида таъкидламасдан илож йўқ. Бу воқеа икки давлат ўртасидаги алоқаларда янги босқични бошлаб берди, десак муболаға бўлмайди. Давлат раҳбарлари учрашувида асосан иқтисодий масалалар кўтарилган бўлса-да, бундан кейин таълим ва инсон саломатлиги борасида ҳам янги ҳамкорликлар йўлга қўйилишини алоҳида айтиб ўтмоқчиман. Шунингдек, 2018 йилда Корея Республикаси Президенти Мун Жи Ин жанобларининг ҳам Ватанингизга ташрифи режалаштирилган. Ўйлайманки, давлат раҳбарлари икки халқ ва маданият вакиллари ўртасидаги бундай дўстона муносабатлар келажакда ўзининг ижодий изини қолдиради. Бугун тақдим этилган ҳужжатли фильмда кўтарилган масалалар эса менинг юқоридаги гапларимга тўла исбот бўла олади.
“ЎЗБЕК КАБОБИНИНГ ТАЪМИ БИР УМР ЁДИМДА ҚОЛАДИ!”
Чанг Канг Бок, продюссер ва “KBS” киностудиясининг режиссёри: — Биринчи ўринда ушбу фильм яратилишида ижодий гуруҳимизга катта ёрдам берган Ўзбекистон Электорон оммавий ахборот воситалари миллий ассоциациясига ўз миннатдорчилигимни билдираман. Корейс халқи “Ариранг Саша” фильмини жуда илиқ кутиб олди. Томоша қилганлар рейтинги эълон қилинганда аҳолининг 90 фоизи уни кўриб баҳо бергани гапимнинг яққол исботи.
Ўзбекистонга келганимнинг биринчи кунида мени ўзбек кабоби билан меҳмон қилишди. Бу таъм бир умр ёдимдан чиқмаса керак. Меҳмондўст ўзбек халқига яна бир бор ўз миннатдорчилигимни билдираман.
Хулоса
Икки давлатнинг ижодкорлари томонидан олиб борилаётган бундай дўстона ҳамкорликлар келажакда икки давлатнинг нафақат, ижтимоий-сиёсий ҳаётида балки, туризмнинг янада ривожланишида ўз таъсирини кўрсатишига ишонамиз.
