Миср полициячилари Қоҳирада донорлик аъзолари билан савдо қилувчи шифокорлар ва воситачилардан иборат жиноий гуруҳни қўлга олди, деб хабар берди Ria.ru нашри.
Мазкур жиноий гуруҳ 7 кишидан ташкил топган. Полиция ходимларининг маълумот беришича, гуруҳ аъзолари муҳтожликда кун кечирувчи, қочқин ва муҳожирларни тана аъзоларини сотишга даъват қилишган. Уларнинг ҳуқуқ-тартибот идораларига шикоят қилмасликлари учун баъзи бир ҳужжатларга имзо чекишга мажбурлашган.
Жабрланганларнинг айтишича, уларга жарроҳлик операциясидан сўнг 5 минг фунт (300 доллар) тўланган, қолган пулларни эса навбатдаги донор топилгандан кейингина олиш мумкин бўлган. Шу сабабли улар янги “донор”ларни топишга мажбур қилинганлар, акс ҳолда улар қолган пулни ололмаганлар. Оқибатда занжирлардан иборат жиноий гуруҳ юзага келган.
