“SCORPION” фильмининг энг қийин саҳналари Бухоро вилоятида суратга олинди (Фото)

“SCORPION”да бугунги куннинг долзарб муаммоси – халқаро жиноятчилик мавзусига ёшлар нигоҳи билан қаралади. Ўзбекистон ёшлар иттифоқи, “Ўзбеккино” Миллий агентлиги, Ўзбекистон Республикаси Ички ишлар вазирлиги, Ўзбекистон миллий телерадиокомпанияси ва Кинематографияни ривожлантириш маркази томонидан имзоланган қўшма қарор асосидаги ушбу фильмнинг суратга олиш ишлари айни кунларда Бухоро вилоятида давом этмоқда.

Россиядан лойиҳа учун юртимизга махсус ташриф буюрган мутахассислар фильм кадрларини суратга олиш майдонининг ўзида хомаки монтаж қилиб боришади.

Фильм ижодий ва техник жамоасини Ўзбекистон, Россия, АҚШ ва Германия мутахассислари ташкил этади.

Фильмнинг суратга олиш ишлари Тошкент шаҳри ва Бухоро вилоятлари, шунингдек Россия ҳамда Марокаш давлатлари ҳудудида бўлиб ўтади.

Лойиҳанинг катта шов-шувга сабаб бўлган воқеаси сифатида унда туркиялик машҳур актёр Мурат Йилдирим (ўзбек томошабинларига “Осиё” сериалидаги Демир роли билан яхши таниш)нинг иштирокини қайд этиш мумкин.

5 март куни Ёш киноижодкорлар кенгаши раиси ҳамда фильм продюсери Ойбек Абдушукуров Мурат билан Истамбул шаҳрида шартнома имзолади.

Мурат Ўзбекистонга рафиқаси, марокашлик машҳур актриса ва модел Имане Эльбани билан бирга ташриф буюриши ҳақида хабар берилган эди.

“SCORPION”да Мурат Йилдирим суратга тушадиган саҳналар Бухоро вилоятида суратга олинади. Унинг айнан қайси образда чиқиши ҳозирча сир тутилмоқда.

Фильм бош қаҳрамонларидан бири (ака роли)ни Фарҳод Маҳмудов ижро этади. Иккинчи бош қаҳрамон (ука роли) ижрочиси ҳозирча сир тутилмоқда.

Шунингдек, фильмда элимиз суйган санъаткорлар Карим Мирходиев, Раъно Шодиева ҳам суратга тушишмоқда.

Жанри: триллер

Давомийлиги: 90 дақиқа

Продюсер:Ойбек Абдушукуров

Режиссёр: Мухлиса Азизова

Сценарий муаллифлари: Боб Андервуд (АҚШ), Рашид Маликов

Операторлар: Макс Тцуи (Германия), Жасур Шаметов

Рассом: Дониёр Абдураҳмонов

Картина директори: Сайёра Худайбердиева

Либослар бўйича рассом: Элсевар Исҳоқова