АҚШда яшовчи оила роумингдаги интернет учун катта миқдорда қарз қилган оператор устидан шикоят қилди, деб хабар берди lenta.ru нашри.
Калифорниянинг Сан-Хосе шаҳрида яшовчи Вивиан Чанг (Vivian Chung) оиласи билан дам олиш учун Вьетнамга борган. У чет элда интернетдан фойдаланиш нархлари тўғрисидаги маълумотларни билиш учун интернетга кирган ва шундан кейин ижтимоий тармоқлардан фойдаланмаган.
У дам олишдан Сан-Хосега қайтгандан кейин оиласи интернет учун 13 минг доллар қарз бўлганлигини билган. T-Mobile операторининг берган маълумотига кўра, интернетга Чангнинг ўғлининг телефонидан кирилган ва бу 30 дақиқани ташкил этган.
“Қандай қилиб, ярим соатлик телефон ҳисоби 13 минг доллар бўлиши мумкин? Ахир бу сафаримиз учун кетган харажатдан ҳам кўп-ку?” деб эътироз билдирди Чанг. Унинг ўғли эса ортиқча пул кеткизмаслик учун саёҳат вақтида телефони авиарежим ҳолатида бўлганлигини маълум қилди.
T-Mobile вакиллари билан бўлган музокарадан кейин қарз миқдори 3 минг доллар, деб белгиланди. Чанг бундай қарорни асоссиз деб ҳисоблади.
