Қозоғистоннинг Ақтўбе шаҳрида 52 нафар ўзбекистонликнинг умрига зомин бўлган автобусдаги ёнғин бўйича суд ўз ишини бошлади, деб хабар берди ТАСС.
Фожеа жорий йилнинг 18 январь куни содир бўлган эди. Ўзбекистон фуқароларини олиб кетаётган автобус Ақтўбе вилоятининг Иргиз туманидаги трассада ёниб кетган. Беш киши тирик қолган, 52 киши ҳодиса жойида ҳалок бўлган. Ёнғин оловдан эҳтиётсизлик билан фойдаланиш сабабли келиб чиққан. Тергов жараёнида ҳайдовчи салонни кавшар лампада иситмоқчи бўлгани аниқланган.
Суд эшитувларига 11 киши - Ўзбекистондан фожеа оқибатида ҳаётдан кўз юмганларнинг қариндошлари ҳамда айбланувчи - автобус ҳайдовчиси Мақсат Пернебековнинг опаси ҳам етиб келган.
Судланувчилар беш киши бўлиб, улар уч нафар автобус ҳайдовчиси ҳамда “Азия транзит сервис” транспорт компанияси таъсисчиси ва бу компания механигидир. Автобус ҳайдовчилари – Нуржан Қирғизбаев, Мақсат Пернебеков ва Барат Танатов 2018 йилнинг 26 январидан бери Ақтўбедаги тергов изоляторида ҳибсда ушлаб турилибди. Уларга нисбатан икки ва ундан ортиқ кишининг ўлимига олиб келган ёнғин хавфсизлиги талаблари ва транспорт воситалари эксплуатацияси қоидаларини бузиш айби қўйилмоқда.
Қолган икки нафар судланувчи Ақтўбедан чиқиб кетмаслик борасида тилхат билан озодликка чиқарилган эди. Компания таъсисчиларига юридик шахс сифатида ўз зиммаларига олган мажбуриятларни бажармаслик ва носоз транспорт воситасини эксплуатацияга чиқариш, ҳужжатларни сохталаштириш каби айблар қўйилмоқда. Механикка носоз автобусни йўналишга чиқариш айби қўйилган.
