Иккинчи жаҳон урушининг энг кекса ветеранларидан бири вафот этди, дея маълум қилмоқда РИА Новости нашри.
Америкалик ветеран Ричард Овертон 112 ёшида вафот этди.
Овертон 1906 йили дунёга келиб, уруш пайтида уч Тинч океани оролларида, Пёрл-Харбор, Окинава, Иводзимада авиацион муҳандислик батальонида хизмат қилган. У кексайган маҳали урушни эслашни ҳам хоҳламаган экан.
Овертон умрининг аксар йилларини Техасдаги Остин шаҳрида ўтказган. Ўзининг айтишича, Овертон узоқ умри учун Яратгандан миннатдор бўлган. Шунга қарамай, у тамаки чеккан, ҳатто вискидан ҳам бош тортмаган.
Ўтган ҳафта Овертон пневмония ташхиси билан касалхонага ётқизилган эди.
