Ёш киноижодкорлар фильмлари учун грант ажратилади

“Ўзбеккино” Миллий агентлиги томонидан ўтказилган ижодий анжуманда замонавий ўзбек киносида ёш кадрлар муаммоси ва унинг ечимлари муҳокама этилди. Шунингдек замонавий кинода рассомнинг роли, продюсерлик фаолияти, овоз ва мусиқий безак каби мавзулар ҳам таҳлил қилинди.Мазкур анжуманда асосан ёш киноижодкорларга сўз берилди. Улар ўзларини қийнаётган муаммоларни, соҳа истиқболи учун ўз таклиф ва мулоҳазаларини билдириб ўтишди.

Сарвар Каримов, кинорежиссёр: 

– “PROlogue” фестивали бошловчи киноижодкорлар, талабалар учун катта имкониятлар майдони эди. Лекин ўтган йилдан бошлаб, қисқа метражли фильмлар эмас, тўла метражли фильмлар фестивалига айланиб, ўз йўналишини ўзгартирди. Ёшлар учун номинациялар ҳам камайтирилган. Бу фестивал ўзининг ўрни, вазифасини йўқотган фестиваль. Мен истардимки, у яна аввалги ҳолатига қайтарилса, талабалар, бошловчи ижодкорлар учун яхши стимул бўларди. Кино – жамоавий ижод. Шунинг учун ёшларни қўллаб-қувватлаш керак. Турли жанрларда тажриба қилиб кўриш учун ҳам имконият бериш зарур.

Жаҳонгир Аҳмедов, кинорежиссёр:

– Ҳозирги ёшларга тезроқ кино билан боғланиш имкониятини беришимиз лозим. Бугун уларга имкон бермасак, авлодлар орасидаги бўшлиқ ҳали-бери тўлмайди. Кадрларни фақат ЎзДСМИдан излайверишимиз нотўғри, менимча. Чунки режиссёрлар, операторлар, актёрлар съёмка майдонида туғилади.

Яна бир кинорежиссёр Нодира Зуфарова санъат олийгоҳини тугатганига 8-10 йил бўлганига қарамасдан, иккинчи режиссёр, режиссёр ассистенти вазифасида ишлаб юрган ёш ижодкорларга ҳам имконият бериш кераклиги тўғрисида гапирди.

“Биз, албатта, ёшларимизга ҳар тарафлама ёрдам беришга, уларни қўллаб-қувватлашга тайёрмиз! Агар уларнинг муаммоларини ўргансак ва ҳал қилишда ёрдам берсак, истеъдодларини намоён этишлари учун имконият яратсак миллий киномизни жаҳон экранларига олиб чиқиш учун замин яратган бўламиз”, – деди “Ўзбеккино” Миллий агентлиги Бош директори Фирдавс Абдухолиқов. 

“Ўзбеккино” раҳбари Агентлик биноси таъмирлангандан сўнг бу ерда ёш ижодкорлар учун 150 ўринли ижодий лабoратория очилишини маълум қилди. “Ёшлар ижодий тажриба студияси” билан бир қаторда марказлашган “Ёшлар ижодий тажриба мактаби”ни ташкил этиш кўзда тутилаётганини айтди. Шунингдек келгусида ёш киноижодкорлар учун Агентлик томонидан йилига 20 та қисқа метражли, болалар учун – 10 та тўлиқ метражли, институт талабалари учун 10 та қисқа метражли фильмларга грант маблағлари ажратилишини таъкидлади.