"Потребитель Бухара" каналида бир мижоз тўлов қилиш учун Халқ банки кассаси хизматидан фойдалангани ва шу пайтда унга мажбуран лотерея чиптаси сотилганини ёзган.
Халқ банки матбуот котиби Юнус Бўроновнинг расмий каналида ушбу ҳолат ўрганиб чиқилгани айтилмоқда.
Ўрганиш натижасига кўра, мижоз ҳайдовчилик гувоҳномасини олиш учун иккинчи марта имтиҳон топширишга келган ва Халқ банки кассаси орқали тўлов қилмоқчи бўлган.
Кассага тўлов қилиб бўлгач, кассир қиз мижозга Халқ банкининг янги маҳсулотларини, жумладан, қиймати 3 минг сўмлик "Омад қуши" лотереясини ҳам тавсия қилган. Мижоз ўз хоҳиши билан омадини синаб кўришга рози бўлган, аммо лотереядан ютуқ чиқмаган.
Кассир қизнинг айтишича, мижоз билан ҳеч қандай тортишув ёки келишмовчилик бўлмаган.
Маълумот ўрнида айтиш керакки, Халқ банки мижозларга ўз маҳсулотларини тавсия этиш, мижозлар эса бу тавсияни қабул қилиш ёки қилмаслик ҳуқуқига эга.
