Тошкент шаҳридаги Турин политехника университетида “Ўзбекистон аёлларининг 100 та энг яхши инновацион лойиҳаси” III Республика танловининг якуний босқичи ўтказилмоқда. Унда Мазкур танловнинг 2 босқичида ғолиб деб топилган 300дан ортиқ хотин-қизлар иштирок этмоқда.
Танлов доирасида “Ихтирочи аёллар-2020” форуми ва иқтидорли хотин-қизларнинг ишланмалари, макет ва инновацион маҳсулотлари бўйича кўргазма ҳам бўлиб ўтмоқда.
Танловнинг мақсади ихтирочилик, рационализаторлик ва тадбиркорлик фаолияти билан шуғулланиб, ўз қобилиятини намоён этаётган юртимизнинг иқтидорли хотин-қизларини излаб топиш, уларнинг инновацион лойиҳалари, ишланмалари, техника, технология ва дастурий маҳсулотларини амалиётга тадбиқ этишларида амалий кўмак бериш, ҳар томонлама қўллаб-қувватлаш, илмий-техникавий ва интеллектуал салоҳиятини юксалтиришдир.
Танлов натижаларига кўра, изланувчан ва ихтирочи хотин-қизлар “Энг яхши ихтиро”, “Энг яхши фойдали модель”, “Энг яхши саноат намунаси”, “Энг яхши рационализаторлик таклифи”, “Энг яхши ЭҲМ учун яратилган дастур ва маълумотлар базаси”, “АКТ соҳаси бўйича энг яхши инновацион лойиҳа”, “Энг самарали инновацион лойиҳа”, “Иқтидорли қизнинг истиқболли инновацион ғояси”, “Энг яхши бизнес лойиҳа”, “Омадли старт”, “Ҳунарманд хотин-қизларнинг энг яхши инновацион лойиҳаси” номинацияларининг ғолиблари аниқланади.
Танловнинг биринчи босқичи 2019 йил 15 – 30 ноябрь кунлари бўлиб ўтди. Унда мамлакатимиз иқтисодиёт тармоқларига ўз инновацион лойиҳалари, ишланмалари, дастурий маҳсулотлари, рационализаторлик таклифларини жорий этиш мақсадида бўлган 4000 дан зиёд олима аёллар, тадқиқотчилар, иқтидорли талаба ва ўқувчи қизлар, ихтирочи, рационализатор, муҳандис, конструктор, дастурчи, шифокор, фармацевт, ҳунарманд, тадбиркор ҳамда мутахассис хотин-қизлар ўз ихтиролари, инновацион ғоя, технология ва лойиҳалари билан иштирок этдилар.
Иккинчи босқич 2019 йил 1 декабридан 2020 йилнинг 25 январигача ўтказилди.
III Республика танловинининг якуний босқичида мамлакатимизнинг барча ҳудудларидан тавсия этилган иштирокчиларнинг ҳужжатлари ва инновацион лойиҳалари Республика Экспертлар Кенгаши томонидан кўриб чиқилмоқда ҳамда уларнинг тақдимотлари эшитилиб, кенг муҳокама қилинмоқда. Лойиҳалар ичидан 100 та энг муносиби танловнинг ғолиби сифатида танлаб олинади ва уларни амалга жорий этиш чоралари кўрилади.
