Ёз ойлари гарчи кинопремьералар, янги фильмлар тақдимоти учун бироз ноқулай фурсат бўлса ҳам кинотеатрларимизда янгидан-янги фильмлар намойиши кетилмоқда. Галдаги саҳифамиз орқали кинотеатрларда намойиш этилаётган энг янги ва тақдимоти кутилаётган фильмлар ҳақида маълумот оласиз.
“Болалик синовлари”
Болаларга аталган мазкур ҳажвий кинофильм “Ўзбеккино” миллий агентлиги буюртмасига асосан “Ўзбекфильм” киностудияси томонидан суратга олинган. Ўзбекистон халқ ёзувчиси Шукур Холмирзаевнинг «Чиллак ўйини», «Банди бургут», «Оқтош» ва «Омон овчининг ўлими» ҳикоялари асосида суратга олинган фильмда ўсмир ёшлар ҳаёти, уларнинг орзу-умидлари, кўнгил кечинмалари ҳақида ҳикоя қилинади. Картинада табиат ва инсон мавзусига ҳам кенг ўрин берилган. Фильм Алишер Навоий киносаройи ва Киночилар уйи кинотеатрида намойиш этиляпти.
“Уринг, жоним, уринг”
Ўзимизнинг режиссёрлар абсурд комедия жанрига қўл уришди. “Уринг, жоним, уринг” фильмини тақдим этиш арафасида турган режиссёр Абдуқодир Усмонов асли “Баён” гуруҳининг вакили. Тим Майсиннинг “Сеҳрли чойнак” ҳикояси мотиви асосида суратга олинган мазкур картинада бош ролларни Муҳаммадисо Абдулхаиров, Толибжон Мўминов, Наргиза Абдуллаева, Севара Солиева, Маъмур Султонов ижро этишган. Шуни алоҳида таъкидлаб ўтиш жоизки мазкур Тим Майсоннинг мазкур ҳикояси асосида аввал Голивуд ва Болливудда ҳам фильм суратга олинган. Бундан ташқари фильмда мамлакатимизда истиқомат қиладиган ҳинд миллатига мансуб кишиларни ҳам учратишингиз мумкин. “Уринг жоним, уринг” фильми премьераси 12 июнь куни бўлиб ўтиши кутиляпти.
“Ёлғон дунё”
Май ойинг энг сўнгги кунларида экран юзини кўрган “Ёлғон дунё” фильми бугун кинотеатрларда энг томошабинбоп фильмлар рўйхатида турибди. Унда бош ролларни хонандалар Отабек Муталхўжаев ва Каниза ижро этишган. Фильмни дебютант режиссёр Равшан Усмонов суратга олган. Муҳаббат ва уни ортидан келадиган хиёнат, ҳою ҳавасларга алданиб, армонларга дуч келиш каби ҳолатлар фильмнинг асосий мазмунини ташкил этади. Картина пойтахтимиз кинотеатрларида намойиш этиляпти.
“Кўз ёшим”
Ўзбекистонда хизмат кўрсатган артист Саида Раметова, актриса Асал Шодиева ва актёр Шавкат Комиловлар иштирокидаги “Кўз ёшим” фильми бу йил ёз ойининг энг узоқ кутилган фильмларидан бири дея эътироф этиляпти. Мазкур фильмда актриса Асал Шодиевани буткул бошқа қиёфада кўриш имкониятига эга бўласиз. Тез орада фильм премьераси бўлиб ўтиши кутилмоқда.
