Avval xabar qilinganidek, O`zbekiston Respublikasi Prezidenti Shavkat Mirziyoev raisligida 28 avgust kuni umumiy o`rta ta`lim muassasalarida o`quv yiliga tayyorgarlik masalalari bo`yicha videoselektor yig`ilishi o`tkazildi. Unda davlat rahbari kasalikka chalinmaslik choralari yuzasidan gapirdi.
«Infeksiyani yuqtirmaslik, avvalo, o`zimizga, o`z sog`lig`imizga bo`lgan e`tiborimizga, oilamizdagi muhitga bog`liq. Agar hamma, butun jamiyatimiz tozalik, tibbiy himoya va ijtimoiy masofa qoidalariga amal qilsa, kasallik ko`paymaydi» — Shavkat Mirziyoev.
Prezident raisligida o`tkazilayotgan videoselektor yig`ilishida hokimlar, sektor rahbarlari hamda mutasaddi idoralar xodimlari har bir mahallada, jamoat joylari, transport va korxonalarda sanitariya talablari bajarilishi bo`yicha temir intizomni ta`minlashi zarurligi aytib o`tildi.
Koronavirusga chalingan bemorlarni dunyodagi eng ilg`or va ishonchli usullar bilan davolash uchun barcha choralar ko`rilayotgani, jumladan, hozirgi paytda Rossiya, Germaniya, Turkiya, Xitoydan 75 nafar yuqori malakali shifokor yurtimizda ish olib borayotgani ta`kidlandi.
