O`zbekistonlik qizlar xalqaro ta`lim dasturi doirasida nano sun`iy yo`ldoshni yig`ib, stratostferaga uchiradi.
Bu haqda O`zbekiston Respublikasi Innovasion rivojlanish vazirligi ma`lum qildi.
Unga asosan, joriy yilning 2 noyabr kuni UNICEF, Tech4Impact NNT va O`zbekiston Respublikasi Innovasion rivojlanish vazirligi tomonidan fan, texnologiya, muhandislik va matematika (STEM - Science, Technology, Engineering and Mathematics) sohalariga qiziquvchi qizlar uchun UniSat xalqaro ta`lim dasturi rasman ishga tushirilgan.
Qizlarning kosmik tadqiqotlarga qiziqishini oshirishga qaratilgan ushbu dastur YuNICEFning O`zbekiston, Qozog`iston va Qirg`izistondagi vakolatxonalari tomonidan qo`llab-quvvatlanadi.
"Innovasion rivojlanish vazirligi UniSat dasturini qo`llab-quvvatlashdan mamnun. O`zbekiston qizlari ilm-fan, muhandislik va ilg`or texnologiyalar sohasida rivojlanish uchun katta salohiyatga ega va biz qizlarni nano sun`iy yo`ldoshni uchirishda o`z kuchlarini sinab ko`rishga taklif qilamiz, - deydi Innovasion rivojlanish vaziri o`rinbosari Shahlo Turdiqulova.
Qayd etilishicha, vazirlikda nano sun`iy yo`ldoshlarni loyihalash va yig`ish uchun barcha shart-sharoitga ega laboratoriya mavjud bo`lib, vazirlik eshiklari yoshlar uchun doim ochiq.
Ma`lumot uchun, dastur davomida O`zbekistonning barcha viloyatlaridan tanlovdan o`tgan 15-24 yoshli qizlar dasturlash va muhandislik bo`yicha bilimlarini oshirish, shuningdek, jamoada ishlash va loyihalarni boshqarish ko`nikmalarini yaxshilash imkoniyatlariga ega bo`ladilar.
