O`zbekistonda oilaviy mehmon uylarining umumiy soni 2365 tani tashkil etadi.
Turizm va sport vazirligining ma`lum qilishicha, joriy yilning yanvar-sentyabr oylarida Respublika bo`yicha turizm salohiyati yuqori bo`lgan 100 dan ortiq qishloq va mahallalarda oilaviy mehmon uylarini tashkil etish, ularda xizmat ko`rsatish turlarini ko`paytirish, oilaviy tadbirkorlikni rivojlantirishga qaratilgan ishlar olib borilgan.
Natijada yangi ish o`rinlari soni 1489 taga oshirilgan va mamlakat bo`yicha oilaviy mehmon uylarining umumiy soni 2365 taga etkazilgan.
Xususan, Sirdaryo, Jizzax, Andijon, Farg`ona, Namangan, Toshkent, Navoiy, Samarqand, Buxoro viloyatlari hamda Toshkent shahrining tuman mahallalarida uyma-uy yurib, aholi o`rtasida oilaviy mehmon uylarini tashkil etish tartiblari, tadbirkorlik faoliyatini boshlashda taqdim etiladigan imtiyozlar, imkoniyatlar haqida keng tushuntirish ishlari olib borilib, tadbirkorlikni rivojlantirish bo`yicha amaliy ko`mak berilgan.
