Bosh prokuratura huzuridagi Majburiy ijrosi byurosi organlari tomonidan ijro hujjatlari ijrosini ta`minlashdan qasddan bo`yin tovlab kelayotgan qarzdor jismoniy shaxslarni topish va ularning mol-mulklarini aniqlash borasida samarali ishlar amalga oshirilmoqda, deya xabar bermoqda Bosh prokuratura Axborot xizmati.
Xususan, joriy yilning 6 oyi davomida Byuroning Buxoro viloyati boshqarmasi qidiruv sho``basi tomonidan o`tkazilgan qidiruv tadbirlari natijasida qidiruvdagi 396 nafar shaxslarning 119 nafari va qidiruvdagi 589 ta transport vositalarning 388 tasi topilib, qidiruv harakatlari tugatilgan.
Misol tariqasida, G`ijduvon tumanlararo iqtisodiy sudining 16.03.2021 yildagi ajrimiga asosan, qarzdor korxonadan undiruvchi ATB “Agrobank” Buxoro viloyati filiali foydasiga jami 431,9 mln. so`m kredit qarzdorligini undirish, undiruvni korxonaga tegishli “Malibu”, “Cobalt” va “Lacetti” rusumli avtotransport vositalariga hamda “Krone SD” rusumli tirkamaga qaratishga doir ijro hujjati bo`yicha avtotransport vositalariga nisbatan qidiruv e`lon qilingan.
Qidiruv ishlari natijasida, “Malibu”, “Cobalt” va “Lacetti” rusumli avtotransport vositalari Buxoro viloyatida, “Krone SD” rusumli tirkama esa Toshkent shahrida aniqlanib, avtotransport vositalari tegishli tartibda jarima maydonchasiga joylashtirilgan.
