Bu haqqda Tagqi mehnat migrasiyasi agentligi matbuot xizmati xabar bermoqda.
Ma`lum qilinishicha, asli Farg`ona viloyatidan bo`lgan M.O. 2021 yilning iyul oyidan buyon Kaliningrad viloyatida ishlaydi. Yurtdoshimiz ehtiyotsizlik oqibatida mehnatga layoqatsiz bo`lib qoldi.
Qiyin ahvolga tushib qolgani fuqaro O`zbekistonga qaytishda yordam so`rab, Tashqi mehnat migrasiyasi agentligining Sankt-Peterburg shahridagi vakolatxonasiga murojaat qildi.
Murojaat o`rganilganida, M.O. qurilish ob`ektida ishlayotganda balandlikdan yiqilib tushish oqibatida umurtqa suyagi va oyog`i singani, uzoq muddatga mehnat qilolmasligi ma`lum bo`ldi.
Musofirchilikda qiyin ahvolda qolgan yurtdoshimizga yordam ko`rsatilib, Xorijda mehnat faoliyatini amalga oshiruvchi fuqarolarni qo`llab-quvvatlash hamda ularning huquq va manfaatlarini himoya qilish jamg`armasi mablag`lari hisobidan aviachipta olib berildi va Kaliningrad – Sankt-Peterburg – Farg`ona yo`nalishidagi aviareys orqali O`zbekistonga qaytarildi.
