Sog`liqni saqlash vazirining tegishli buyrug`i bilan 2022/2023 o`quv yilida klinik ordinatura (rezidentura) bo`yicha mutaxassisliklar va ularga muvofiq keluvchi bakalavriat ta`lim yo`nalishlari ro`yxati, ularda o`qish muddati, umumiy va maqsadli qabul rejasi hamda test sinovlarini tashkil etish jadvali tasdiqlandi.
Klinik ordinatura mutaxassisliklariga o`qishga qabul qilish ikki bosqichda amalga oshiriladi.
Bunda, tibbiyot oliy ta`lim muassasalari va ularning filiallari, Tibbiyot xodimlarining kasbiy malakasini rivojlantirish markazi, respublika ixtisoslashtirilgan ilmiy-amaliy tibbiyot markazlari, ilmiy-tadqiqot institutlari tomonidan tanlangan mutaxassislikka mos ravishda tegishli bakalavriat ta`lim yo`nalishlari fanlari negizida kirish sinov imtihonlari amalga oshiriladi.
Fanlar bo`yicha kirish imtihonlari og`zaki va test sinovlari shakllarida o`tkaziladi.
Klinik ordinatura mutaxassisligiga mos ravishda tegishli bakalavriat ta`lim yo`nalishlari bo`yicha imtihonlar natijalari sinovlar o`tkazilganidan keyin uch kun muddatda ta`lim muassasasi tomonidan idoralararo elektron axborot almashinuv tizimi orqali Sog`liqni saqlash vazirligiga taqdim etiladi hamda mazkur muassasaning rasmiy veb-saytida e`lon qilinadi.
2022/2023 o`quv yili qabulida hujjat topshiruvchilarga qulaylik yaratish maqsadida ro`yxatdan o`tish jarayoni bevosita va onlayn tarzda – tashkilotlarning rasmiy veb-saytlari orqali amalga oshiriladi.
Klinik ordinatura (rezidentura)ga hujjatlar qabul qilish joriy yilning 22 avgustigacha (shu kuni ham) davom etadi.
