2022 yil 1 avgustdan boshlab O`zbekiston va Turkmaniston xalq artisti Bobomurod Hamdamov, O`zbekiston xalq artisti, Navoiy mukofoti sovrindori Sherali Jo`raev va Abdurauf Olimov asarlaridan lisenziya shartnomasi tuzmasdan har qanday shaklda va usulda foydalanish taqiqlanadi. Bu haqda Madaniyat vaziri Ozodbek Nazarbekov xabar berdi.
Mazkur taqiq O`zbekiston Respublikasining “Mualliflik huquqi va turdosh huquqlar to`g`risida”gi Qonuniga va O`zbekiston Respublikasi Fuqarolik kodeksiga (1034-modda) muvofiq amal qiladi.
Taqiq ularning asarlaridan ommaviy foydalanish, tarqatish va barcha ommaviy axborot vositalari, ijtimoiy tarmoqlar va turli ijtimoiy kanallar, platformalar va veb-saytlarda joylashtirish, shuningdek, asarlardan ommaviy tadbirlar va tantanalarda foydalanishga taalluqlidir.
Eslatib o`tamiz, mualliflik huquqi egalarining mualliflik huquqi va turdosh huquqlarini buzish, ularning asarlaridan noqonuniy foydalanish amaldagi qonunchilikka muvofiq tegishli javobgarlikka sabab bo`ladi.
Amaldagi Konstitusiyamizning 36-moddasida har bir shaxs mulkdor bo`lishga haqli ekanligi mustahkamlangan. Mazkur moddanining birinchi qismiga intellektual mulk huquqiga ega bo`lish haqidagi norma kiritilishi taklif etilayapti. Xususan, 36-moddaning birinchi qismi quyidagi tahrirda bayon etilishi mumkin: "Har kim qonun bilan muhofaza qilinadigan mulkka, shu jumladan intellektual mulkka bo`lgan huquqqa ega".
