Ijtimoiy tarmoqlarda dastlab Izboskan tuman hokimi yordamchisi ish vaqtida oyog`ini uzatib, fuqaro bilan bepisand munosabatda bo`layotgani aks etgan video tarqaldi. Shundan so`ng hokim yordamchisi esa bloger videoni tarqatmaslik uchun undan 300 dollar pul so`ragani aks etgan audio tarqaldi.
Izboskan tumani hokimi yordamchisi Hojimurod Umrzoqovning "Daryo"ga aytishicha, bloger undan bir necha marotaba pul so`ragan. U esa yordam berib kelgan. So`nggi paytlarda esa blogerga moliyaviy ko`mak berolmay qolgan. 2022 yilning 6 iyun kuni ham xalqaro blogerlar kuniga biror narsa qilib berishini so`raganida, hech narsa qilib berolmasligini bildirgan.
Izboskan tuman hokimi yordamchisi ish vaqtida oyog`ini uzatib o`tirganini tan olgan. Uning aytishicha, bloger bu videoni tarqatib, uni ishdan oldirish bilan qo`rqitgan va niyatiga etgan. Ushbu video ijtimoiy tarmoqlarga tarqalgach, hokim yordamchisi lavozimidan ozod etilgan.
Bloger Muhammadyusuf Yo`ldoshev esa o`sha kuni haqiqatan ham "Menga 300 dollar ber. Sening videoingni chiqarmayman", degan taklifni bildirganini tan olgan, ammo bu gaplari kinoya-hazilomuz tarzda gapirganini aytgan.
Izboskan tumani hokimligi axborot xizmati ushbu holatga munosabat bildirgan. Munosabatda hokim yordamchisi lavozimidan ozod etilgan, qolgan xodimlar esa tartibga chaqirilgani ma`lum qilingan.