Madaniy merosni himoya qilish inspeksiyasi boshchiligida Ishchi guruh tomonidan joriy yilning iyun - iyul oylari Andijon, Namangan viloyati tarixi va madaniyati davlat muzeylarida hamda Termiz davlat muzey qo`riqxonasida saqlanayotgan noyob ashyolar xatlovdan o`tkazildi hamda ularning saqlanishi va havfsizlik holati o`rganildi.
Madaniy meros agentligi bu haqda Darakchi.uz'ga xabar berdi.
Qayd etilishicha, Ishchi guruh tomonidan Andijon viloyati tarixi va madaniyati davlat muzeyida jami 4 dona, Namangan viloyati tarixi va madaniyati davlat muzeyida jami 9 dona ashyolar muzeyning Kirim va Inventar kitoblari hamda ilmiy pasportlarining tavsifnomalariga, o`lchami, ishlanish uslubi va yaratilgan davri bo`yicha mos kelmasligi aniqlandi.
Shuningdek, Termiz davlat muzey qo`riqxonasida ham o`rganishlar olib borilgan va jami 24 dona ashyolar muzeyning Kirim va Inventar kitoblari hamda ilmiy pasportlarining tavsifnomalariga, o`lchami, ishlanish uslubi va yaratilgan davri bo`yicha mos kelmasligi, 58 nomdagi ashyolar muzey fondida yo`qligi ma`lum bo`lgan.
Xulosalarga ko`ra, Andijon viloyati tarixi va madaniyati davlat muzeyida aniqlangan zarar qiymati 31.000.000 so`mni, Namangan viloyati tarixi va madaniyati davlat muzeyida 23.700.000 so`mni, Termiz davlat muzey qo`riqxonasida 3.466.800.000 so`mni tashkil qilgani aytiladi.
