Birlashgan Millatlar Tashkilotining Nyu-Yorkdagi bosh qarorgohida so`zlagan nutqida Tojikiston Tashqi ishlar vaziri Sirojiddin Muhriddin Qirg`iziston va Tojikiston chegarasidagi voqealarga e`tibor qaratdi. Bu haqda "Amerika ovozi" xabar berdi.
"Tojikiston o`z hududida fuqarolik urushini boshidan kechirgan davlat sifatida tinchlik qadrini yaxshi biladi. Qo`shni Xitoy va O`zbekiston bilan chegara bo`yicha murosa diplomatiyasiga a`lo darajada amal qilayotgan davlat sifatida etarli tajribaga ega.
Afsuski, o`zaro imzolangan o`nlab protokollarga Qirg`iziston hukumati amal qilmayapti. Avvalgi hujjatlar Qirg`izistonda hokimiyat o`zgarishi bilan o`z kuchini yo`qotib, bir tomon manfaatlariga xizmat qilmoqda", - dedi Sirojiddin Muhriddin.
Diplomatning ta`kidlashicha, chegara bo`yicha kelishuvlar BMT hujjatlari va xalqaro standartlar asosida hal etilishi kerak. Bunga amal qilayotgan Tojikiston agressormi yoki amal qilmayotgan Qirg`iziston agressormi, degan savol tashladi u.