Toshkent shahri Shayxontohur tumanida yo`l-patrul xizmati xodimi haydovchi bilan janjallashdi.
IIBB holat yuzasidan munosabat bildirdi.
Qayd etilishicha, 7 oktyabr kuni shahar yo`l harakati xavfsizligi bo`limi inspektori B.Nazirxo`jaev Shayxontohur tumanidagi Bunyodkor va Islom Karimov ko`chalari chorrahasida tirbandlikni bartaraf etish maqsadida harakatni tartibga solib turgan.
Shuningdek, Lacetti haydovchisi 1984 yilda tug`ilgan E.A. uyali telefondan foydalanib, inspektorning ishorasiga bo`ysunmasdan chorrahaga kirib kelgan. Inspektor haydovchiga sodir etgan qoidabuzarligini tushuntirayotgan vaqtida haydovchi uning onasini haqorat qilgan, natijada o`zaro tortishuv yuzaga kelgan.
Haydovchining harakatlariga huquqiy baho berish maqsadida Shayxontohur tumani ichki ishlar organi faoliyatini muvofiqlashtirish bo`limi tomonidan tergovga qadar tekshiruv va yo`l-patrul xizmati inspektorining xatti-harakatlari yuzasidan shahar Ichki ishlar bosh boshqarmasi tomonidan xizmat tekshiruvi o`tkazilayotgani ma`lum qilingan.
