Avval xabar qilganimizdek, kecha, 28 sentyabr kuni Toshkent shahar Sergeli tumani "Quruvchilar" dahasida joylashgan bojxona omborxonasida kuchli portlash oqibatida yong`in sodir bo`ldi.
Voqea sodir bo`lgan vaqtda bojxona omboriga tutash hududda BYD rusumli avtomobillar ham bo`lgan. Afsuski, ularning ba`zilari portlash to`lqini va shisha parchalaridan yuzaki zarar ko`rgan. Kompaniya holat bo`yicha rasmiy munosabat bildirdi.
"Sizga shuni ma`lum qilamizki, barcha shikastlangan avtomobillar utilizasiya qilishga yuboriladi, zero bu xavfsizlik va atrof-muhitni saqlash nuqtai nazaridan muhimdir. Avtomobillarni etkazib berish bo`yicha barcha majburiyatlar shartnomada ko`rsatilgan muddatlarda bajariladi.
Portlash sabablari bo`yicha surishtiruv ishlari olib borilayotganligi va yakuniy ekspert xulosasi yo`qligi sababli, hodisaga elektr transport vositalarining aloqadorligi yoki boshqa faktlar haqidagi ma`lumotlarni tarqatmaslikni so`raymiz.
Fojiali hodisa tufayli barcha jabrlanganlar va ularning oila a`zolariga hamdardligimizni bildiramiz", - deyiladi xabarda.
Eslatib o`tamiz, kecha, 28 sentyabr kuni Toshkent shahar Sergeli tumani "Quruvchilar" dahasida joylashgan bojxona omborxonasida kuchli chaqnash oqibatida yong`in sodir bo`ldi. Toshkent hokimi portlashdan talofat ko`rgan uylarning zarari qoplab berilishini ma`lum qildi. Voqea joyiga Bosh vazir Abdulla Aripov va boshqa mas`ullar etib borgan.
SSVga ko`ra, portlash oqibatida jabrlanganlarning umumiy soni 163 nafarni tashkil etmoqda. Bir kishi halok bo`lgan. Holat yuzasidan jinoyat ishi qo`zg`atildi.
