Quyi Chirchiqda 15 yoshli bolaning tanasi 90 foiz kuyib ketdi

Bolalar ombudsmaniga Toshkent viloyati Quyi Chirchiq tumanida istiqomat qiluvchi, 2008 yilda tug`ilgan J.J. o`z yashash xonadonida isituvchi qozon portlashi oqibati 90% og`ir tana kuyish jarohati olganligi tufayli muntazam tibbiy xizmatga va davolanish uchun moddiy yordam ko`rsatilishiga muhtojligi to`g`risidagi murojaat kelib tushdi, deya xabar bermoqda Bolalar ombudsmani axborot xizmati. 

Ma`lum qilinishicha, Bolalar ombudsmani Sog`liqni saqlash vazirligi va Bosh prokuratura bilan birgalikda mazkur holatni o`rgangan. 

Aniqlanishicha, 2008 yilda tugilgan J.J. 04.10.2023-yilda bunday jiddiy kuyish jaroxatini olganidan so`ng Respublika shoshilinch yordamga olib kelinib, u erda barcha tez tibbiy yordam choralari ko`rilgan va 2 oy davomida (04.10.2023-04.12.2023) shifokorlar tomonidan davolanib, zarur tibbiy muolajalar ko`rsatilgan. 

So`ng esa jarohatlar darajasi murakkabligiga va doimiy tibbiy kuzatuv talab etishiga qaramay J.J. ota-onasi tomonidan uy sharoitida parvarish qilish uchun olib ketilgan.

Hozirda J.J. ga zarur tibbiy muolajalar ko`rsatildi va doimiy shifokor kuzatuvi biriktirildi. Shuningdek, viloyat Sog`liqni saqlash boshqarmasi tomonidan qizga muntazam davolanish uchun kerak bo`lgan dori-darmonlar ta`minlanmoqda hamda unga nogironlik nafaqasini belgilash uchun kerakli tibbiy hujjatlar to`planish jarayonida. 

Bolaning sog`lig`ini ta`minlash masalasi hozirda viloyat prokuraturasi nazoratida bo`lib, Bolalar ombudsmani ham bu borada o`z kuzatuvini davom ettiradi, deyiladi xabarda.