Toshkent viloyati Yangiyo‘l tumanidagi Nurafshon ko‘chasida joylashgan xonadonda 5 kishining murdasi topildi.
Xabarlarga ko‘ra, kecha, 26 iyul kuni soat 06:19larda ushbu manzilda yong‘in sodir bo‘lgan. Yangiyo‘l tumani FVB Yong‘in qutqaruv qismi o‘t o‘chiruvchilari tomonidan voqea joyiga chiqilib, kelib chiqqan yong‘in bartaraf etilgan.
Xonadonni ko‘zdan kechirish davomida 33 yoshli erkak, 25 yoshli ayol va 6,3,2 yoshli bolalarning murdalari turli tan jarohatlari bilan topilgan. Bu ma’lumotni Bosh prokuratura matbuot kotibi Hayot Shamsuddinov mahalliy nashrlarga tasdiqlagan.
Mazkur holat yuzasidan Yangiyo‘l tuman prokuraturasi tomonidan Jinoyat kodeksining 97-moddasi (Qasddan odam o‘ldirish) jinoyat ishi qo‘zg‘atildi. Tezkor-tergov guruhi tomonidan jinoyatni fosh etish choralari ko‘rilmoqda.
