Sverdlovsk viloyatidagi bola huquqlari bo‘yicha vakil Igor Morokov migrant oilalardan kelgan o‘quvchilarni nogiron bolalar toifasiga tenglashtirish kerakligini aytdi. Bu haqda "zamon.uz" yozmoqda.
Shu tariqa Morokov Rossiya maktablarida tahsil olayotgan, ammo rus tilini bilmaydigan o‘quvchilarning mavjudligi bilan bog‘liq muammoga "yechim" taklif qildi. Ombudsman bu o‘quvchilar soni kam bo‘lgan sinflarni tashkil etish va o‘qituvchilarga qo‘shimcha haq to‘lash imkonini berishini aytdi.
"Bugungi kunda bizda alohida ta’lim ehtiyojlari bo‘lgan bolalar toifasi mavjud. Bular imkoniyati cheklangan bolalar, nogiron bolalar hisoblanadi. Menimcha, bu bolalarni ya’ni migrant bolalarini ham shu toifaga kiritish lozim", - dedi u.
Bu migrantlarning farzandlarini alohida, kichikroq sinflarda tilni chuqurroq o‘rganish bilan o‘qitish imkonini berishi ta’kidlandi. Morokov Yekaterinburgda “bu toifadagi o‘quvchilar soni ancha ko‘p bo‘lgan” ikkita maktab borligini aytib, 149-sonli maktabni misol qilib keltirdi. U o‘quvchilarning 90 foizi “migrant bolalar” ekanini ta’kidladi.
