Buxoroning Qorako‘l tumanidagi Poykent maskanidan miloddan avvalgi I va milodiy I-IV asrlarga oid qurol-aslahalar topildi. Bu haqda Islom sivilizatsiyasi markazi Axborot xizmati xabar berdi.
Qadimiy Poykent shahri Qorako‘l tumanida joylashgan bo‘lib, uni o‘rta asr tarixchilari “Savdogarlar shahri” yoki “Mis shahar” deya ta’riflagan. Ta’kidlanishicha, u Buxorodan ham qadimiydir.
Qazish ishlari davomida yaqinda Poykentdan qadimiy qurol-aslahalar, metall jihozlar, shuningdek, ibodatxona marosimlarida qo‘llanilgan qo‘ng‘iroqlar va isiriqdonlar topildi. Bu buyumlar eramizdan avvalgi I asr va eramizning I asriga tegishli bo‘lib, saklar va massagetlar davridan qolgan.
Restavratorlar ushbu topilmalarni asl holatiga keltirish ustida ishlamoqda. Bu jarayon o‘ta murakkab va katta bilimni talab qiladi. Ushbu topilmalar So‘g‘d davri devoriy suratlarida ham uchraydi. Arxeologik topilmalar sayyohlarning diqqatini jalb qilish bilan birga, yurtimizning boy tarixi haqida chuqurroq tasavvur beradi.
Ma’lum bo‘lishicha, shuningdek, izlanishlar natijasida uzunligi 13,7 metr bo‘lgan katta zal yoki hovli atrofida supalar topilgan. III-IV asrlarda u qo‘shni ibodatxonadan pastda joylashgan, shuning uchun unga shimol tomondan 12 pog‘onali, kengligi 3,4 metr zinapoya va pandus tushgan.
