2025 yil 4 aprel kuni Toshkent shahri Sirg‘ali tumanida joylashgan “Mudarris” xususiy maktabida o‘qituvchi va o‘quvchi o‘rtasida yuzaga kelgan zo‘ravonlik holati bo‘yicha ochiq sayyor sud majlisi o‘tkazildi. Bu haqda Toshkent shahar sudi darakchi.uz ga xabar berdi.
Aniqlanishicha, maktabning o‘qituvchisi T.A. 7-sinfda tahsil oluvchi A. Ani boshiga va ko‘krak qismiga urgan. Bu harakatlar oqibatida o‘quvchi yengil tan jarohati olgan. Voqea ishtirokchilari — o‘quvchi, uning otasi, shifokor va o‘qituvchining o‘zi sudda shaxsan ishtirok etib, ko‘rsatmalar berdi.
Sud tibbiy ekspertiza xulosasi, guvohlar so‘rog‘i va hujjatlar asosida o‘qtuvchini aybli deb topdi va unga nisbatan Ma’muriy javobgarlik to‘g‘risidagi kodeksning 52-moddasi 2-qismiga muvofiq 1.500.000 so‘m miqdorida jarima jazosi tayinladi.
Sud tomonidan ta’kidlanganidek, o‘qituvchi o‘z kasbiy mas’uliyatini suiiste’mol qilgan hamda o‘quvchiga nisbatan jismoniy kuch ishlatish orqali qonun buzilishiga yo‘l qo‘ygan.
Bu voqea ta’lim muassasalarida bolalar xavfsizligi va o‘qituvchilarning mas’uliyati qanchalik muhim ekanini yana bir bor ko‘rsatmoqda.
