Rossiyadagi Valaam monastirining Sochidagi bo‘limi rahbari — sxiiqumon Gavriil lavozimidan ozod qilindi. Bu chora uning may oyida aytgan bahsli so‘zlari ortidan ko‘rilgan. U, xususan, islom dinini “noto‘g‘ri” deb atagan va musulmonlar haqida tahdidli ifodalar ishlatgan edi.
Gavriil o‘z va’zida musulmonlarni “boshqa din tarafdorlari” emas, “armiyaga teng kuch” deb atab, “mulla buyursa, ular Moskvadagi odamlarni qirg‘in qiladi, Ichki ishlar vazirligi bunga ulgurmaydi ham”, deya fikr bildirgan.
Ramzan Qodirovga yaqinligi bilan tanilgan, “Axmat” maxsus bo‘linmasi komandiri Apti Alaudinov bu so‘zlarga keskin munosabat bildirdi. U ruhoniyni “Dajjol askarlarining vakili” deb atab, “Rossiyada 30 million mahalliy musulmon yashaydi. Kim bo‘libsan o‘zi sen, bizga dinimizni noto‘g‘ri deyishga?” deya norozilik bildirgan.
Valaam monastiri matbuot xizmatining bayonotida “sxiiqumon”lavozimdan olinishi haqida ma’lumot berilgan, ammo bu qaror sabablari ochiqlanmagan.
Eslatib o‘tamiz, Rossiya prezidenti Vladimir Putin ushbu monastirni bir necha bor ziyorat qilgan. 2024 yil iyul oyida Belarus va Rossiya prezidentlari aynan shu yerda yopiq muzokaralar o‘tkazgan edi.
