Россиядаги Валаам монастирининг Сочидаги бўлими раҳбари — схииқумон Гавриил лавозимидан озод қилинди. Бу чора унинг май ойида айтган баҳсли сўзлари ортидан кўрилган. У, хусусан, ислом динини “нотўғри” деб атаган ва мусулмонлар ҳақида таҳдидли ифодалар ишлатган эди.
Гавриил ўз ваъзида мусулмонларни “бошқа дин тарафдорлари” эмас, “армияга тенг куч” деб атаб, “мулла буюрса, улар Москвадаги одамларни қирғин қилади, Ички ишлар вазирлиги бунга улгурмайди ҳам”, дея фикр билдирган.
Рамзан Қодировга яқинлиги билан танилган, “Ахмат” махсус бўлинмаси командири Апти Алаудинов бу сўзларга кескин муносабат билдирди. У руҳонийни “Дажжол аскарларининг вакили” деб атаб, “Россияда 30 миллион маҳаллий мусулмон яшайди. Ким бўлибсан ўзи сен, бизга динимизни нотўғри дейишга?” дея норозилик билдирган.
Валаам монастири матбуот хизматининг баёнотида “схииқумон”лавозимдан олиниши ҳақида маълумот берилган, аммо бу қарор сабаблари очиқланмаган.
Эслатиб ўтамиз, Россия президенти Владимир Путин ушбу монастирни бир неча бор зиёрат қилган. 2024 йил июль ойида Беларус ва Россия президентлари айнан шу ерда ёпиқ музокаралар ўтказган эди.
