Qozogʻistonning shimolidagi Qoʻstanay viloyatida mavsumning ilk qori yogʻdi. "Todayinfo.kz" xabariga koʻra, viloyatda qor sezilarli darajada yoqqan va ijtimoiy tarmoqlarda aholi ushbu holatni surat va videolar orqali faol muhokama qilmokda.
Sinoptiklarning maʼlum qilishicha, kechalar havo harorati 1–6 darajagacha sovib, kunduz kunlari esa 3–8 darajagacha iliqlik boʻlishi kutilmokda. Yogʻingarchilik davom etishi, yomgʻirning esa yana qorga aylanishi ehtimoli mavjud.
Mamlakatning katta qismi shimoliy sikloning taʼsirida qolmokda. Natijada shimoliy hududlarda kuchli yomgʻir va sovuq havo kuzatilmokda, janub va sharqda esa yogʻingarchilik boʻlmasligi kutilmokda. Butun respublika boʻylab shamol kuchayishi, tong va tunda tuman tushishi mumkin.
Qoʻstanay politsiyasi haydovchilarni ehtiyot boʻlishga chaqirdi — yogʻingarchilikdan keyin yoʻllar sirpanchiq boʻlishi mumkin. Transport qatnashchilariga tezlikni kamaytirish va masofani saqlash, piyodalarga esa faqat belgilangan joylardan yoʻlni kesib oʻtish tavsiya etildi.
