Sirdaryo viloyatining Xovos tumanida o‘z otasini haqoratlab, uydan haydab chiqargan o‘g‘il 5 sutkaga qamaldi.
Bildirilishicha, ota-o‘g‘il o‘rtasidagi janjallar oldin ham bo‘lib turgan. Buni mahalla inspektori ham tasdiqlagan. O‘g‘il o‘zining o‘rtoqlari bilan choyxonaga borgan va spirtli ichimlik iste’mol qilib, mast holatda o‘zining uyiga kelgan. Shundan so‘ng, uyda bo‘lgan yolg‘iz otasiga baqir-chaqir qilib, o‘zaro janjallashib, haqorat qilgan hamda ko‘chaga chiqarib yuborgan. Shundan so‘ng ota noilojlikdan IIO xodimlariga murojaat qilgan.
“Uyga kelib, menga tashlanib qoldi. Birinchi urmoqchi bo‘ldi, irdi ham. Sahar to‘rtgacha tashqarida o‘tirdim”— deydi ota.
Sudda ayblanuvchi spirtli ichimlik ta’sirida bo‘lganini aytib, yengillik so‘ragan. Shu tariqa u Ma’muriy javobgarlik to‘g‘risidagi kodeksning 183-moddasida (mayda bezorilik) nazarda tutilgan huquqbuzarlikni sodir etganlikda aybli deb topilgan va 5 sutka ma’muriy qamoqqa olish jazosi tayinlangan.
