Ijtimoiy tarmoqlarda tarqalgan fermerlarga nisbatan IIV xodimlari tomonidan bosim o‘tkazilgani haqidagi xabarlar Bosh vazir huzuridagi tadbirkorlar huquqlarini himoya qilish bo‘yicha vakil tomonidan o‘rganilmokda.
Farg‘ona viloyati Rishton tumanida ayrim fermer xo‘jaliklariga huquqni muhofaza qiluvchi organ vakillari tomonidan bosim o‘tkazilgani va ularning huquqlari poymol etilgani haqida xabarlar ijtimoiy tarmoqlarda muhokamalarga sabab bo‘ldi.
Ushbu holat yuzasidan Bosh vazir huzuridagi Bosh biznes-ombudsman rasmiy bayonot berdi. Unda ta’kidlanishicha, fermer xo‘jaliklari mamlakatda qonuniy faoliyat yuritayotgan tadbirkorlik subyekti hisoblanadi va ularga asossiz bosim yoki z‘ravonlik ko‘rsatish mutlaqo man etiladi.
“Davlat organlari tadbirkorlarga nisbatan har qanday noqonuniy harakatlardan tiyilishi shart”, — deyiladi ombudsman bayonotida.
Hozirda holat Bosh biznes-ombudsman devoni tomonidan alohida tartibda o‘rganilmokda. Yakuniy xulosa va choralar yuzasidan qo‘shimcha ma’lumot berilishi kutilmokda.
