Davlat rahbari endilikda viloyat va tuman sog‘liqni saqlash rahbarlarining kunlik qabuli mahallalarda o‘tkazilishini ma’lum qildi.
“Shunda xalq bilan muloqot paydo bo‘ladi, odamlar rozi bo‘ladi, tibbiyot tizimiga xolis bahoni o‘zi beradi. Har bir rahbar o‘zini bemorning o‘rniga qo‘yib, poliklinikada bir kunda qancha vaqt sarflanishini o‘zi ko‘rsin. Shunda haqiqiy muammolarni his qiladi”, — dedi Prezident.
Shuningdek, tuman va viloyat bosh shifokorlari respublika markazlari bilan to‘g‘ridan-to‘g‘ri ishlaydigan integratsiyalashgan tizim joriy etilishi qayd etildi. Ular hududdagi kasalliklar holati va dinamikasiga qarab, markazlarga davolash va profilaktika bo‘yicha buyurtmalar beradi.
2026 yildan rahbarlik lavozimlarini tayinlashda yangi tizim joriy qilinadi —
“Endi barcha tibbiyot muassasalarida rahbar va bosh shifokor lavozimlari ajratiladi. Rahbarlar menejment ko‘nikmalariga ega, tadbirkorlik tajribasi bo‘lgan insonlar orasidan tanlanadi.”
Prezident, shuningdek, rag‘batlantirish tizimi yangilanishini ham e’lon qildi. Kasalliklarning oldini olish, davolashni yaxshilash, raqamlashtirishni to‘liq yakunlagan eng ilgor tuman va viloyat sog‘liqni saqlash rahbarlariga:
“O‘zbekistonda xizmat ko‘rsatgan tibbiyot xodimi” unvoni;
orden va medallar;
30 million so‘m pul mukofoti;
rahbarlik qilayotgan muassasa infratuzilmasini yaxshilash uchun 500 million so‘m mablag‘ ajratiladi.
Bundan tashqari, har bir viloyatdan eng yaxshi ikki nafar rahbar AQSh, Germaniya, Buyuk Britaniya, Koreya va Turkiya kabi ilgor davlatlarda menejment kurslariga yuboriladi.
