Oktabr oyida Namangan viloyatidagi xonadonlardan birida erkak to‘y marosimida 2018 yilda tug‘ilgan qizni zo‘rlaganligi haqida xabar tarqalgan edi.
Kuni kecha Namanganda mazkur jinoyat ishini ko‘rib chiqish yakunlandi. Bu haqda Oliy sud matbuot xizmati xabar berdi.
Jinoyat ishlari bo‘yicha Yangiqo‘rg‘on tuman sudi sudlanuvchi, 1987 yilda tug‘ilgan, muqaddam sudlangan B.S.ga nisbatan hukm chiqardi.
Sud jarayoni yopiq rejimda o‘tkazildi.
Sud hukmiga ko‘ra, B.S. 2018 yilda tug‘ilgan voyaga yetmagan I.K.ga nisbatan JKning 112-moddasi (o‘ldirish yoki zo‘rlik ishlatish bilan qo‘rqitish) 1-qismi, 118-moddasi (nomusga tegish) 4-qismi, 119-moddasi (jinsiy ehtiyojni zo‘rlik ishlatib qondirish) 4-qismida nazarda tutilgan jinoyatlarni sodir etganlikda aybli deb topildi.
Jinoyatlar majmui bo‘yicha unga 18 yil muddatga ozodlikdan mahrum qilish jazosi tayinlandi.
Bundan tashqari, JKning 34-moddasi 3-qismi "a" bandi asosida B.S. o‘ta xavfli retsidivist deb topildi. Shu munosabat bilan u jazoni og‘irroq sharoitlarda o‘taydi va muddatidan oldin ozod qilish imkoniyati minimalashtiriladi.
Xususan, sudning ajrimiga ko‘ra, mahkum jazoning dastlabki uch yilini qamoqda, qolgan qismini maxsus tartibli koloniyada o‘tkazadi.
