Октябрь ойида Наманган вилоятидаги хонадонлардан бирида эркак тўй маросимида 2018 йилда туғилган қизни зўрлагани ҳақида хабар тарқалган эди.
Куни кеча Наманганда мазкур жиноят ишини кўриб чиқиш якунланди. Бу ҳақда Олий суд матбуот хизмати хабар берди.
Жиноят ишлари бўйича Янгиқўрғон туман суди судланувчи, 1987 йилда туғилган, муқаддам судланган Б.С.га нисбатан ҳукм чиқарди.
Суд жараёни ёпиқ режимда ўтказилди.
Суд ҳукмига кўра, Б.С. 2018 йилда туғилган вояга етмаган И.К.га нисбатан ЖКнинг 112-моддаси (ўлдириш ёки зўрлик ишлатиш билан қўрқитиш) 1-қисми, 118-моддаси (номусга тегиш) 4-қисми, 119-моддаси (жинсий эҳтиёжни зўрлик ишлатиб қондириш) 4-қисмида назарда тутилган жиноятларни содир этганликда айбли деб топилди.
Жиноятлар мажмуи бўйича унга 18 йил муддатга озодликдан маҳрум қилиш жазоси тайинланди.
Бундан ташқари, ЖКнинг 34-моддаси 3-қисми "а" банди асосида Б.С. ўта хавфли рецидивист деб топилган. Шу муносабат билан у жазони оғирроқ шароитларда ўтайди ва муддатидан олдин озод қилиш имконияти минималлаштирилади.
Хусусан, суднинг ажримига кўра, маҳкум жазонинг дастлабки уч йилини қамоқда, қолган қисмини махсус тартибли колонияда ўтказади.
