Nigeriyaning shimoli-sharqidagi Mayduguri shahrida joylashgan masjidda sodir bo‘lgan portlash oqibatida kamida yetti kishi halok bo‘ldi. Bu haqda BBC xabar berdi.
Ma’lumotlarga ko‘ra, hodisa 24 dekabr kuni shom namoz oldidan Gamboru bozori hududidagi masjidda yuz bergan. Portlash vaqtida masjid odamlar bilan to‘la bo‘lgan. Ayrim guvohlar hujumni o‘z joniga qasd qilgan shaxs amalga oshirganini aytmoqda.
Mahalliy politsiya bu voqeani ehtimoliy terrorchilik hujumi sifatida baholamoqda. Hozircha hech bir qurolli guruh mas’uliyatni o‘z zimmasiga olmagan. Jarohatlanganlar soni aniq emas, ular o‘nlab kishilar bo‘lishi mumkin.
Mayduguri Borno shtati poytaxti bo‘lib, u “Boko Haram” va ISHIDga aloqador guruhlar faoliyati bilan bog‘liq hudud hisoblanadi.
