O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev 13 yanvar kuni bo‘lib o‘tgan Xavfsizlik kengashining kengaytirilgan yig‘ilishida mamlakat harbiy xavfsizligi va mudofaasini mustahkamlash masalalariga to‘xtaldi.
Yig‘ilishda zamonaviy xavf va tahdidlar mazmuni hamda ko‘lami jadal o‘zgarib borayotgani qayd etilar ekan, davlat rahbari sakkiz yil avval qabul qilingan Mudofaa doktrinasi hamda 1997 yilda tasdiqlangan Milliy xavfsizlik kontseptsiyasini qayta ko‘rib chiqish vaqti kelganini ta’kidladi.
Ma’lum qilinishicha, yangi Mudofaa doktrinasi O‘zbekistonning hech qaysi harbiy blokka qo‘shilmaslik siyosatiga sodiq qoladi. Hujjatda ko‘p tomonlama diplomatiyani davom ettirish, yuqori texnologiyalarga asoslangan mudofaa strategiyasini shakllantirish, harbiy mustaqillikni mustahkamlash va mintaqaviy barqarorlikni ta’minlash ustuvor yo‘nalishlar sifatida belgilanishi ko‘zda tutilmoqda.
Prezident ta’kidlaganidek, yangilangan doktrina armiyani texnologik jihatdan modernizatsiya qilish va ilg‘or harbiy yechimlarni joriy etish uchun mustahkam asos bo‘lib xizmat qilishi lozim.
