O'zbekistonda 2027 yildan boshlab ilmiy darajalar berish tizimida bir qator byurokratik tartiblar bekor qilinadi. Bu Prezidentning "Yangi avlod ilmiy kadrlarini tayyorlash va ularni attestatsiya qilish tizimini takomillashtirish to'g'risida"gi 98-sonli farmonida belgilandi.
Hujjatga ko'ra, 2027 yil 1 yanvardan quyidagi talab va tartiblar amaliyotdan chiqariladi:
— mustaqil izlanuvchilardan tashqari hollarda chet tili fanidan malakaviy imtihon topshirish;
— Oliy attestatsiya komissiyasi tomonidan dissertatsiya mavzularini ro'yxatdan o'tkazish va himoya haqida e'lon berish;
— dissertatsiyani yetakchi tashkilotda muhokamadan o'tkazish;
— ijtimoiy-gumanitar fanlar bo'yicha DSc dissertatsiyasi natijalari asosida monografiya chop etish;
— dissertatsiya avtoreferatini nashr qilish;
— ilmiy natijalar amaliyotga joriy qilingani haqida xulosa olish;
— dissertatsiyani Oliy attestatsiya komissiyasi ekspert kengashida ilmiy ekspertizadan o'tkazish;
— himoya qilingan dissertatsiya bo'yicha ilmiy kengash qarorini OAK tomonidan tasdiqlash;
— ta'lim va ilmiy faoliyat uchun jalb qilingan xorijlik mutaxassislarning ilmiy daraja hujjatlarini nostrifikatsiya qilish.
Shuningdek, xorijda olingan ilmiy daraja hujjatlari O'zbekistondagi faoliyati davomida to'g'ridan to'g'ri tan olinadi.
Farmonda qayd etilishicha, 2027 yil 1 yanvarga qadar dissertatsiya himoyasi bo'yicha e'lon berilgan izlanuvchilarga ilmiy darajalar eski tartib asosida beriladi.
Bundan tashqari, 2027 yildan ilmiy daraja beruvchi kengashlar faoliyati samaradorligini baholash bo'yicha reyting tizimi joriy etiladi.
