Ўзбекистонда 2027 йилдан бошлаб илмий даражалар бериш тизимида бир қатор бюрократик тартиблар бекор қилинади. Бу Президентнинг “Янги авлод илмий кадрларини тайёрлаш ва уларни аттестация қилиш тизимини такомиллаштириш тўғрисида”ги 98-сонли фармонида белгиланди.
Ҳужжатга кўра, 2027 йил 1 январдан қуйидаги талаб ва тартиблар амалиётдан чиқарилади:
— мустақил изланувчилардан ташқари ҳолларда чет тили фанидан малакавий имтиҳон топшириш;
— Олий аттестация комиссияси томонидан диссертация мавзуларини рўйхатдан ўтказиш ва ҳимоя ҳақида эълон бериш;
— диссертацияни етакчи ташкилотда муҳокамадан ўтказиш;
— ижтимоий-гуманитар фанлар бўйича DSc диссертацияси натижалари асосида монография чоп этиш;
— диссертация авторефератини нашр қилиш;
— илмий натижалар амалиётга жорий қилингани ҳақида хулоса олиш;
— диссертацияни Олий аттестация комиссияси эксперт кенгашида илмий экспертизадан ўтказиш;
— ҳимоя қилинган диссертация бўйича илмий кенгаш қарорини ОАК томонидан тасдиқлаш;
— таълим ва илмий фаолият учун жалб қилинган хорижлик мутахассисларнинг илмий даража ҳужжатларини нострификация қилиш.
Шунингдек, хорижда олинган илмий даража ҳужжатлари Ўзбекистондаги фаолияти давомида тўғридан тўғри тан олинади.
Фармонда қайд этилишича, 2027 йил 1 январга қадар диссертация ҳимояси бўйича эълон берилган изланувчиларга илмий даражалар эски тартиб асосида берилади.
Бундан ташқари, 2027 йилдан илмий даража берувчи кенгашлар фаолияти самарадорлигини баҳолаш бўйича рейтинг тизими жорий этилади.
