Avvalroq O'zbekiston prezidenti Shavkat Mirziyoyev “Kichik biznes subyektlarining o'sishi uchun yanada qulay iqtisodiy va ma'muriy shart-sharoitlar yaratish to'g'risida”gi farmonni imzolagani haqida xabar berilgan edi. Prezident administratsiyasi rahbari Saida Mirziyoyeva mazkur hujjatning ahamiyatiga to'xtalib o'tdi.
Saida Mirziyoyeva so'nggi kunlarda kichik biznes uchun sharoitlar yengillashtirilishi haqidagi yangiliklar ishbilarmon doiralar tomonidan iliq qarshi olinayotganini ma'lum qildi.
Uning ta'kidlashicha, bu masala ancha buyon tadbirkorlar uchun og'riqli muammo bo'lib kelgan. Hududlarga tashriflar chog'ida tadbirkorlar QQS to'lashga o'tish bo'yicha 1 milliard so'mlik chegara juda pastligi, soliq ma'muriyatchiligi murakkabligi, shuningdek, tekshiruv va hisobotlar haddan tashqari ko'pligini ta'kidlab kelgan.
“Natijada biznes xotirjam rivojlanish o'rniga sun'iy ravishda bo'linishga majbur bo'layotgan edi”, — dedi Saida Mirziyoyeva.
Qayd etilishicha, prezident tomonidan imzolangan farmonga muvofiq, mazkur chegara 5 milliard so'mgacha oshirildi.
“Buning samarasini, eng avvalo, oilaviy korxonalar, kafelar, do'konlar, xizmat ko'rsatuvchilar — bir so'z bilan aytganda, o'zining kundalik mehnati bilan mamlakatimiz iqtisodiyotini harakatga keltirayotgan minglab insonlar his qiladi”, — dedi u.
Shuningdek, hujjatda kichik biznesni qo'llab-quvvatlashga qaratilgan yana bir qator muhim chora-tadbirlar ham nazarda tutilgan.
