Танк устида ўтирган ота-қизнинг суратлари эълон қилинди.
КХДР етакчиси Ким Чен Ин Корея халқ армияси пойтахт мудофааси корпусининг ўқув базасига ташриф буюриб, пиёда ва танк бўлинмаларининг қўшма ҳужум бўйича тактик машғулотларини кузатди. Машғулотларда махсус топшириқли бўлинмалар, зирҳли танк қўшинлари ва танк ротаси иштирок этди.
Ким Чен Ин янги танк кўп йиллик ишланмалар маҳсули эканини ва у замонавий ўт очишни бошқариш тизими ҳамда радиоэлектрон кураш воситалари билан жиҳозланганини маълум қилди. У танк армиянинг жанговар қобилиятини оширади ва тунги жангларни ҳам самарали олиб бориш имконини беради, дея таъкидлади:
“Дунёда ушбу танк каби кучли ўзини ҳимоя қилиш функциясига эга зирҳли қурол мавжуд эмас. Тунгги жангларда заиф бўлган қўшинларимизнинг жанговар чекловлари бутунлай бартараф этилди.”
Маълумот учун, 2022 йилдан буён Ким Жу Э отасига ишчи сафарларида мунтазам ҳамроҳ бўлиб келмоқда. Жанубий Корея расмийларига таяниб, унинг вориси ролига тайёрланаётгани ҳақида хабарлар бериб келинмоқда.
