Ma'lum qilinishicha, davlat rahbarining 2022 yil 3 fevraldagi qarori asosida tashkil etilgan texnoparkda kimyo mahsulotlarini chuqur qayta ishlash, yuqori qo'shilgan qiymatli mahsulotlar ishlab chiqarish va investorlar uchun qulay muhit yaratish ishlari amalga oshirilmoqda. Uning infratuzilmasini shakllantirish uchun 25 million dollar yo'naltirilgan.
Qayd etilishicha, 2025 yilda texnoparkda 56 million dollarlik investitsiya o'zlashtirilib, 758 ta ish o'rni yaratilgan. Korxonalar tomonidan 60 million dollarlik 150 dan ortiq turdagi mahsulot ishlab chiqarilgan.
Taqdimotda mineral o'g'itlar, neft-kimyo va maishiy kimyo sohalarida amalga oshirilishi rejalashtirilgan yirik loyihalar haqida ham axborot berildi. Xususan, mineral o'g'itlar ishlab chiqarishni kengaytirish maqsadida umumiy qiymati 2,8 milliard dollar bo'lgan investitsiya loyihalari ishlab chiqilgani ma'lum qilindi.
Shuningdek, Angrenda “Ko'mirdan olefinlar olish” va Qo'ng'irotda “Naftani qayta ishlash” loyihalari orqali polimer mahsulotlariga bo'lgan ichki talabni qoplash hamda import o'rnini bosish ko'zda tutilgan.
Maishiy kimyo sohasida esa import hajmini qisqartirish, mahalliy mahsulotlar ulushini oshirish va eksport ko'rsatkichlarini kengaytirish rejalashtirilmoqda.
