Маълум қилинишича, давлат раҳбарининг 2022 йил 3 февралдаги қарори асосида ташкил этилган технопаркда кимё маҳсулотларини чуқур қайта ишлаш, юқори қўшилган қийматли маҳсулотлар ишлаб чиқариш ва инвесторлар учун қулай муҳит яратиш ишлари амалга оширилмоқда. Унинг инфратузилмасини шакллантириш учун 25 миллион доллар йўналтирилган.
Қайд этилишича, 2025 йилда технопаркда 56 миллион долларлик инвестиция ўзлаштирилиб, 758 та иш ўрни яратилган. Корхоналар томонидан 60 миллион долларлик 150 дан ортиқ турдаги маҳсулот ишлаб чиқарилган.
Тақдимотда минерал ўғитлар, нефть-кимё ва маиший кимё соҳаларида амалга оширилиши режалаштирилган йирик лойиҳалар ҳақида ҳам ахборот берилди. Хусусан, минерал ўғитлар ишлаб чиқаришни кенгайтириш мақсадида умумий қиймати 2,8 миллиард доллар бўлган инвестиция лойиҳалари ишлаб чиқилгани маълум қилинди.
Шунингдек, Ангренда “Кўмирдан олефинлар олиш” ва Қўнғиротда “Нафтани қайта ишлаш” лойиҳалари орқали полимер маҳсулотларига бўлган ички талабни қоплаш ҳамда импорт ўрнини босиш кўзда тутилган.
Маиший кимё соҳасида эса импорт ҳажмини қисқартириш, маҳаллий маҳсулотлар улушини ошириш ва экспорт кўрсаткичларини кенгайтириш режалаштирилмоқда.
