Toshkent viloyatida o‘tkazilgan tezkor tadbir davomida qariyb 9 kilogramm gashish moddasi musodara qilindi. Bu haqda Davlat xavfsizlik xizmati xabar berdi.
Ma’lum qilinishicha, Davlat xavfsizlik xizmati Chegara qo‘shinlari hamda Toshkent viloyati bo‘yicha boshqarmasi xodimlari tomonidan boshqa huquqni muhofaza qiluvchi organlar bilan hamkorlikda giyohvandlik vositalarining noqonuniy muomalasi va kontrabandasiga qarshi qaratilgan tezkor tadbir o‘tkazilgan.
Tadbir doirasida “Toshkent – Farg‘ona” yo‘nalishida harakatlanayotgan “Tracker” rusumli avtomobil yo‘l-patrul xizmati maskanida to‘xtatilgan.
Tekshiruv jarayonida Farg‘ona shahrida yashovchi, 1990 yilda tug‘ilgan va muqaddam Jinoyat kodeksining 166-moddasi (talonchilik) bilan sudlangan fuqaro boshqaruvidagi transport vositasi ko‘zdan kechirilgan. Avtomobil salonidan haydovchi shaxsiy iste’moli uchun saqlab yurgan 1,72 gramm giyohvandlik moddasi aniqlangan.
Qo‘shimcha tekshiruv davomida esa avtomashina yukxonasidan 8 kilogramm 913 gramm gashish moddasi topilib, belgilangan tartibda rasmiylashtirib olingan.
Tergovga qadar tekshiruvda aniqlanishicha, ushbu shaxs mazkur giyohvandlik vositasini qo‘shni davlatdan Toshkent viloyati hududiga kontrabanda yo‘li bilan olib kirgan shaxslardan qabul qilib olgan va uni doimiy yashash manziliga olib ketishni rejalashtirgan.
Hozirda mazkur holat yuzasidan jinoyat ishi qo‘zg‘atilgan. Tergov harakatlari davom etmoqda.
