Тошкент вилоятида ўтказилган тезкор тадбир давомида қарийб 9 килограмм гашиш моддаси мусодара қилинди. Бу ҳақда Давлат хавфсизлик хизмати хабар берди.
Маълум қилинишича, Давлат хавфсизлик хизмати Чегара қўшинлари ҳамда Тошкент вилояти бўйича бошқармаси ходимлари томонидан бошқа ҳуқуқни муҳофаза қилувчи органлар билан ҳамкорликда гиёҳвандлик воситаларининг ноқонуний муомаласи ва контрабандасига қарши қаратилган тезкор тадбир ўтказилган.
Тадбир доирасида “Тошкент – Фарғона” йўналишида ҳаракатланаётган “Tracker” русумли автомобиль йўл-патруль хизмати масканида тўхтатилган.
Текширув жараёнида Фарғона шаҳрида яшовчи, 1990 йилда туғилган ва муқаддам Жиноят кодексининг 166-моддаси (талончилик) билан судланган фуқаро бошқарувидаги транспорт воситаси кўздан кечирилган. Автомобиль салонидан ҳайдовчи шахсий истеъмоли учун сақлаб юрган 1,72 грамм гиёҳвандлик моддаси аниқланган.
Қўшимча текширув давомида эса автомашина юкхонасидан 8 килограмм 913 грамм гашиш моддаси топилиб, белгиланган тартибда расмийлаштириб олинган.
Терговга қадар текширувда аниқланишича, ушбу шахс мазкур гиёҳвандлик воситасини қўшни давлатдан Тошкент вилояти ҳудудига контрабанда йўли билан олиб кирган шахслардан қабул қилиб олган ва уни доимий яшаш манзилига олиб кетишни режалаштирган.
Ҳозирда мазкур ҳолат юзасидан жиноят иши қўзғатилган. Тергов ҳаракатлари давом этмоқда.
