BMTning Narkotiklar va jinoyatchilikka qarshi kurashish boshqarmasi boshqaruv organlari kotibiyati rahbari Jo Dedein-Aman O‘zbekiston delegatsiyasining Jinoyatchilikning oldini olish va jinoiy odil sudlov bo‘yicha komissiyaning 35-sessiyasidagi ishtirokini yuqori baholadi.
Uning ta’kidlashicha, BMTning mazkur yo‘nalishdagi asosiy organi hisoblangan komissiya sessiyasida O‘zbekistondan nufuzli delegatsiya ishtirok etayotgani katta ahamiyatga ega.
“Biz O‘zbekistondan shunday yuqori darajadagi delegatsiya ishtirok etayotganidan chin dildan mamnunmiz va buni yuksak qadrlaymiz”, dedi u.
Jo Dedein-Aman O‘zbekistonning 2031 yilda BMTning Jinoyatchilikning oldini olish va jinoiy odil sudlov bo‘yicha 16-kongressiga mezbronlik qilishga qiziqish bildirganini ham alohida qayd etdi.
Uning so‘zlariga ko‘ra, komissiya sessiyasida ishtirok etayotgan yuqori darajadagi delegatsiya hamda ayollar va bolalar huquqlarini himoya qilishni takomillashtirishga bag‘ishlangan ma’ruza mazkur xalqaro forumga tayyorgarlik ishlari uchun mustahkam asos yaratadi.
“Yuqori darajadagi delegatsiyaning bu yerda ishtirok etayotgani, shuningdek, ayollar va bolalar huquqlarini himoya qilishni takomillashtirish bo‘yicha ilhomlantiruvchi ma’ruza BMTning 16-kongressiga tayyorgarlik ko‘rish jarayoni uchun mustahkam zamin yaratadi”, dedi BMT rasmiysi.
