БМТнинг Наркотиклар ва жиноятчиликка қарши курашиш бошқармаси бошқарув органлари котибияти раҳбари Жо Дедеин-Аман Ўзбекистон делегациясининг Жиноятчиликнинг олдини олиш ва жиноий одил судлов бўйича комиссиянинг 35-сессиясидаги иштирокини юқори баҳолади.
Унинг таъкидлашича, БМТнинг мазкур йўналишдаги асосий органи ҳисобланган комиссия сессиясида Ўзбекистондан нуфузли делегация иштирок этаётгани катта аҳамиятга эга.
“Биз Ўзбекистондан шундай юқори даражадаги делегация иштирок этаётганидан чин дилдан мамнунмиз ва буни юксак қадрлаймиз”, деди у.
Жо Дедеин-Аман Ўзбекистоннинг 2031 йилда БМТнинг Жиноятчиликнинг олдини олиш ва жиноий одил судлов бўйича 16-конгрессига мезбонлик қилишга қизиқиш билдирганини ҳам алоҳида қайд этди.
Унинг сўзларига кўра, комиссия сессиясида иштирок этаётган юқори даражадаги делегация ҳамда аёллар ва болалар ҳуқуқларини ҳимоя қилишни такомиллаштиришга бағишланган маъруза мазкур халқаро форумга тайёргарлик ишлари учун мустаҳкам асос яратади.
“Юқори даражадаги делегациянинг бу ерда иштирок этаётгани, шунингдек, аёллар ва болалар ҳуқуқларини ҳимоя қилишни такомиллаштириш бўйича илҳомлантирувчи маъруза БМТнинг 16-конгрессига тайёргарлик кўриш жараёни учун мустаҳкам замин яратади”, деди БМТ расмийси.
