O‘zbekiston Prezidenti Administratsiyasi rahbari Saida Mirziyoyeva MAGATE bosh direktori Rafael Grossi bilan uchrashuv o‘tkazdi. Suhbatda milliy yadro energetikasi infratuzilmasini rivojlantirish va sohada kadrlar tayyorlash masalalari muhokama qilindi.
O‘zbekiston Prezidenti Administratsiyasi rahbari Saida Mirziyoyeva Xalqaro atom energiyasi agentligi (MAGATE) bosh direktori Rafael Grossi bilan uchrashuv o‘tkazdi.
Ma’lum qilinishicha, Rafael Grossi Jizzax viloyatida atom elektr stansiyasi qurilishi boshlanishiga bag‘ishlangan marosimda ishtirok etish maqsadida O‘zbekistonga tashrif buyurgan.
Uchrashuv davomida tomonlar MAGATE bilan hamkorlikning ustuvor yo‘nalishlarini muhokama qildi. Xususan, milliy yadro energetikasi infratuzilmasini yaratish, yadroviy tibbiyotni rivojlantirish hamda soha uchun yuqori malakali kadrlar tayyorlash masalalariga alohida e’tibor qaratildi.
Saida Mirziyoyeva mazkur yo‘nalishlardagi hamkorlik O‘zbekistonda atom energetikasini xavfsiz va samarali rivojlantirishda muhim ahamiyat kasb etishini ta’kidladi.
