Sankt-Peterburg shahriga amaliy tashrif doirasida O'zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putin bilan uchrashuv o'tkazdi.
Muzokaralar chog'ida O'zbekiston va Rossiya o'rtasidagi keng qamrovli strategik sheriklik hamda ittifoqchilik munosabatlarini yanada rivojlantirish va mustahkamlash masalalari ko'rib chiqildi.
Tomonlar savdo-iqtisodiy hamkorlik yuqori sur'atlarda rivojlanayotganini mamnuniyat bilan qayd etdi. Xususan, yil boshidan buyon ikki mamlakat o'rtasidagi tovar ayirbosh qilish hajmi 20 foizga oshgani ta'kidlandi.
Shuningdek, sanoat, energetika, metallurgiya, transport, kimyo sanoati va iqtisodiyotning boshqa ustuvor tarmoqlarida yirik qo'shma loyihalar amalga oshirilayotgani qayd etildi.
Uchrashuvda tovar ayirboshlashdagi ijobiy sur'atlarni saqlab qolish, kooperatsiya loyihalarini jadallashtirish va hududlararo hamkorlikni kengaytirish muhimligiga alohida e'tibor qaratildi.
Madaniy-gumanitar almashinuvlarni rivojlantirish masalalari ham muhokama qilindi. Xususan, Sankt-Peterburgdagi Mariinskiy teatrida Georg Fridrix Gendelning "Tamerlano" operasi premyerasi bo'lib o'tgani hamda "Ermitaj" davlat muzeyida O'zbekiston amaliy san'ati ko'rgazmasi ochilgani qayd etildi.
Suhbat yakunida davlat rahbarlari bo'lajak ikki tomonlama va xalqaro tadbirlar rejasi yuzasidan ham fikr almashdi.
