Санкт-Петербург шаҳрига амалий ташриф доирасида Ўзбекистон Республикаси Президенти Шавкат Мирзиёев Россия Федерацияси Президенти Владимир Путин билан учрашув ўтказди.
Музокаралар чоғида Ўзбекистон ва Россия ўртасидаги кенг қамровли стратегик шериклик ҳамда иттифоқчилик муносабатларини янада ривожлантириш ва мустаҳкамлаш масалалари кўриб чиқилди.
Томонлар савдо-иқтисодий ҳамкорлик юқори суръатларда ривожланаётганини мамнуният билан қайд этди. Хусусан, йил бошидан буён икки мамлакат ўртасидаги товар айирбошлаш ҳажми 20 фоизга ошгани таъкидланди.
Шунингдек, саноат, энергетика, металлургия, транспорт, кимё саноати ва иқтисодиётнинг бошқа устувор тармоқларида йирик қўшма лойиҳалар амалга оширилаётгани қайд этилди.
Учрашувда товар айирбошлашдаги ижобий суръатларни сақлаб қолиш, кооперация лойиҳаларини жадаллаштириш ва ҳудудлараро ҳамкорликни кенгайтириш муҳимлигига алоҳида эътибор қаратилди.
Маданий-гуманитар алмашинувларни ривожлантириш масалалари ҳам муҳокама қилинди. Хусусан, Санкт-Петербургдаги Мариинский театрида Георг Фридрих Генделнинг "Тамерлано" операси премьераси бўлиб ўтгани ҳамда "Эрмитаж" давлат музейида Ўзбекистон амалий санъати кўргазмаси очилгани қайд этилди.
Суҳбат якунида давлат раҳбарлари бўлажак икки томонлама ва халқаро тадбирлар режаси юзасидан ҳам фикр алмашди.
